CEBU, Philippines — Gimando ni Cordova Mayor Cesar “Didoy” Suan ang paghimo og imbestigasyon labot sa nadiskubrehang expired nga mga relief goods diha sa evacuation center sa Barangay Gabi.
Ang buhatan sa Municipal Disaster Risk Reduction and Management Office (MDRRMO) maoy nagdumala sa evacuation center sa maong lungsod.
Buot masayran ni Suan ang hinungdan nga naabtan expiration date ang maong mga stocks ug wala mapahimusli sa mga Cordovanhon nga nanginahanglan unta niini. “Dili ko mobasol sa miaging administrasyon apan gusto lang nako nga masayran kun unsa gyud ang tinuod nga nahitabo ug nganong napasagdan man kini,”ni Suan pa.
Nadiskubrehan kini ni Suan human siya nag-inspeksyon sa buhatan sa MDRRMO niadtong miaging adlaw.
Si Nanette Garong, executive secretary ni Mayor Suan miingon nga gipaniguro karon sa mayor nga ang maong expired na nga mga goods dili mahatag sa katawhan. —IBM (BANATNEWS)