Kaso sa dengue sa Cebu City nagkadaghan

CEBU, Philippines — Padayonng nagsaka ang mga kaso sa dengue sa Cebu City.

Base sa datos sa Cebu City Health Department gikan sa buwan sa Enero hangtod sa Hunyo 10 ning tuiga niabot na sa 1,033 ang kaso sa siyudad. Matud ni Dr. Jeffrey Ibones, Officer-in-Charge sa Cebu City Health Department gikan sa 946 ka kaso naabot kini og 1,033, nadugangan og 87 ka kaso sa dengue ang siyudad. Sigon sab ni Ibones nga 17 mortality sa siyudad diin sagad niini nag-edad og 10 anyos paubos.

Gipanglantawan sa CCHD nga mosaka pa gyud ang kaso sa dengue tungod kay ting-uwan paman mao nga nagpadayon ang ilang gihimong mga lakang aron mokunhod ang kaso sa dengue sa dakbayan.

“Actually ang dengue man gud dugay na ni siya. I don’t know wala pako ma Doctor naa naman gyud ning dengue, ang management sa dengue the same ra gyud pagpangita sa hinungdan nganong nisaka ang kaso, pagpanglimpyo

sa atoang kabalayan sa surroundings, ang management nato is fluids ra gyud, supplemental if ever gyud naay gipangbati other than hilanat, symptomatic pero ang iyahang tambal gyud is more gyud siya fluid ra gyud management then kinahanglan ma detect nato early,” sigon ni Ibones.

Nanawagan si Dr. Ibones sa katawhan nga kun pananglitan makasinati og sintomas sa dengue magpatan-aw gyud dayon sa doktor aron mahatagan og tambal ug masultihan sa mga angayan nga buhaton kun angay ba i-admit o dili ilabi na kun mosaka ang hematocrit unya moubos ang platelet sa blood examination sa pasyente.

Sa pikas bahin, gipasiugdahan sa Lapu-Lapu City ang Dengue Day caravan gikan sa Lapu-Lapu City Hall ug gitapos sa Hoops Dome sa Barangay Gun-ob sa maong siyudad.

Si Dr. Agnes Realiza City Health Officer sa maong siyudad ang tumong sa dengue caravan mao ang pagsilsil sa hunahuna sa mga tawo ang peligro sa ug kun unsaon paglikay ang dengue. Nanghatag sab sila og mga kemikal nga gamiton sa misting operation.

Gipahigayon usab ang memorandum of agreement nga gipangulohan ni Mayor Junard ‘Ahong’ Chan uban sa

kadagkoan sa Department of Health (DOH) uban sa Lapu-Lapu City Hospital. Ang Siyudad sa Lapu-Lapu adunay 31 ka aktibong kaso sa dengue ug 12 na ang natala nga namatay.

Samtang sa Dakbayan sa Naga gipangusgan sab ang kampanya batok sa dengue bisan pa ang siyudad wala maapil sa listahan sa mga lugar sa Central Visayas nga dunay daghang kaso niini. Ang Siyudad sa Naga nakatala lang og 59 ka kaso sa dengue diin namatyan og usa gikan sa Enero hangtud sa buwan sa Mayo. — Romeo T. Limpangog ug Gabriel Bonjoc/IBM (BANAT NEWS)