CEBU, Philippines — Patay ang usa ka 36-anyos nga lalaki nga biktima human kini gimartilyo sa ulo, gipusil ug gilunggoan sa liog sa iyang silingan nga gidudahan niining maoy nibaligya sa iyang mga binuhing hayop diha sa Barangay Salug, sa Lungsod sa Dalaguete.
Ang biktima giila nga si Mario Ansilay, mag-uuma ug residente sa maong lugar. Samtang ang suspetsado mao si Greg Amancio, 40, nga silingan niini.
Base sa inisyal nga imbestigasyon nga gipahigayon sa kapulisan sa Dalaguete giingong niadto sa gipuy-an sa suspek ang biktima aron komprontasihon kini kun siya bay nibaligya sa iyang mga binuhing hayopan.
Matud pa samtang nagestorya ang duha diha sa gawas sa balay gikatahong kalit kining gibunalan sa suspetsado og martilyo hinungdan nga kini nalukapa ug nawagtangan sa panimuot.
Gikatahong wala pa gyud matagbaw ang suspetsado gipusil niini ang biktima sa makadaghang higayon nga maoy naingnan sa hinanali niini nga kamatayon.
Sumala pa sa nga giabis sab sa suspek ang wala nga dunggan sa biktima ug gilunggo ang liog niini kutob sa tuo nga dunggan. Wala na maabti sa mga polis ang suspek apan nakuha diha sa crime scene nakakuha og basiyo sa bala sa kalibre .45 nga bala ug ang martilyo nga giingong gigamit niini paghapos sa ulo sa biktima.
Dali pa unta nga gidala sa Ildefonso Alcantara Memorial Hospital sa Dalaguete ang biktima apan gideklarar nga dead on arrival. —IBM (BANATNEWS)