Haya ni Labella bukas kini sa public viewing hangtud karong adlawa

CEBU, Philippines — Bisan pa sa kainit sa panahon inubanan sa pagtaligsik kagahapon sa buntag wala kini makapugong sa mga tawo nga nagpaabot diha daplin sa kadalanan nga giagian sa convoy sa haya ni kanhi Mayor Edgardo Labella dihang gidala kini diha sa Cebu City Hall aron mohatag sa ilang pagyukbo.

Si Labella nitaliwan ngadto sa laing kalibutan niadtong Biyernes sa kadlawon tungod sa septic shock secondary to pneumonia ang iyahang haya unang gipahimutang diha sa Crystal Palace sa Cosmopolitan Funeral Homes sa Barangay Lahug.

Sayo pa, ang pamilya ni Labella nipahibawo nga dad-on ang haya sa kanhi mayor diha sa Cebu City Hall gikan sa Crystal Palace diin ang convoy niini niagi diha sa Lahug Veterans Drive, Salinas Drive, Pope John Paul II avenue, Juan Luna Avenue, M.J Cuenco avenue, M.C Briones Avenue, D. Jakosalem street dayon sa city hall.

Sa nahisgutang mga lugar adunay mga fire truck ang nag-standby alang sa water salute isip pagyukbo kang Labella.

Sa wala pa naabot ang convoy diha sa city hall sayo sa buntag kagahapon gihan-ay na sa mga empleyado sa city hall ang tanan nga gikinahanglan ilabi na nga adunay public viewing nga pagahimuon.

Sa pag-abot sa convoy sa haya gisaludohan kini sa opisyales sa kapolisan sa siyudad pinangulohan ni Cebu City Police Office Director Colonel Josefino Ligan. Sila si Mayor Mayor Michael Rama, Vice Mayor Donaldo “Dondon” Hontiveros, konsehales, ubang mga opisyales sa city hall ug mga empleyado ang nisugat sa haya. Sa pamahayag ni Rama nagkanayon kini nga dili niya makalimtan si Labella ug sugod kagahapon hangtud karong adlawa ang katawhan sa siyudad mahatagan og higayon aron makapanamilit ug mohatag ug pagyukbo ug pag-ampo kang Labella.

Ugma sa buntag ipahigayon ang necrological rites pahinungod kangr Labella sa dili pa kini ihatud sa kataposang kapahulayan niini diha sa Golden Haven Memorial Park sa Barangay Talambang.Ang haya ni Labella naa gipahimutang sa lobby sa legislative building sa Cebu City Hall.

Si Jaypee Labella, anak sa kanhi mayor nihatag og hamubong mensahe diin nagpasalamat kini sa katawhan kay iyahang nakita nga daghan ang nagmahal sa ilang amahan.

Nunot niini, si Harold Alcontin, officer-in-charge sa City Disaster Risk Reduction Management Office nagkanayon nga nilanat ngadto sa usa ka oras ug tunga ang dagan sa pagbalhin sa haya ni Labella gikan sa punerarya paingon sa city hall.

Ang haya ni Labella gihunong kini pipila ka minutos diha sa iyang opisina sa city hall diin nakita nga emosyonal ang mga kawani niini. —Rowena D. Capistrano, Sanden J. Anadia/BDB (BANATNEWS)