VECO nag-rewiring sa 11 ka pampublikong tunghaan

CEBU, Philippines — Mapasigarbohong gianunsiyo sa Visayan Electric nga nagmalampuson ang ilang gibuhat nga rewiring diha sa 217 ka lawak sa 11 ka pampublikong tunghaan ug kabahin kini sa  P5.2 milyones nga upgrading of electrical systems o rewiring project karong tuiga.

Nasayran nga tipik kini sa pagpangandam alang sa mga tunghaan nga magsilbing voting precincts sa eleksiyon sunod tuig. Una na nga nagsugod ang maong klase nga proyekto niadtong tuig 2010 diin naghatag kini og kahayag ug hamugaway nga mga lawak, library, school offices, ug uban pa diha sa mga area sa tunghaan.

Maghatag usab kini og luwas nga operasyon alang sa mga magtutudlo aron malayo sa posibleng overloading sa ilang electrical connections ilabi na sa pag-imprinta sa modules ug uban pa nila nga trabaho.

Matud ni Mark Anthony Kindica, Visayan Electric’s Assistant Vice President for Engineering Operations nga tungod  usab sa maong proyekto andam na ang mga tunghaan nga nalambigit niini kon mahibalik na ang face to face classes.

Gipaniguro sa Visayan Electric nga mahimong luwas ang mga tunghaan ug malayo kini sa hulga sa sunog. BDB (BANATNEWS)