Mga vendor nga badlongon tangtangon sa pwesto

CEBU, Philippines — Ang mga sidewalk vendor nga magmagahi sa pagtuman sa gidestino nila nga lugar sa pagpamaligya tangtangon sa tagsa-tagsa nila ka pwesto.

Mao kini ang gibutyag sa head sa Prevention, Restoration, Order, Beautification and Enhancement (PROBE) Raquel Arce.

Kini human adunay pito ka vendors ang nasakpan nga nagpabadlong sa unang semana nila nga pagbalik sa pagpamaligya.

Sa pagkakaron gihatagan una nila kini og tsansa apan sa sunod semana sugdan na nila ang pagtangtang sa mga badlongon nga vendors.

Gibutyag ni Arce nga nagtigom sila sa  mga representante sa nagkadaiyang organisasyon sa mga vendor sa niaging adlaw ug mao gyud kini ang nisugyot nga tangtangon sa ilang mga pwesto ang vendors nga dili motuman sa lagda. Nasayran nga nakabalik na sa pagpaninda sa mga sidewalk ang kapin sa 600 ka vendors sa Dakbayan sa Sugbo apan duna kini limitasyon partikular sa 2.5 metros nga gilapdon sa ilang baligyaanan ug kinahanglang dili sila makabalda sa mga agianan.

Niadtong tuig 2019 naputol sa ilang pagpamaligya ang mga vendor human nipakanaog og hukom ang Department of Interior and Local Government (DILG) ubos sa kamandoan ni Presidente Rodrigo Duterte.

Ang maong mga vendor nakapwesto diha Osmeña Boulevard, Colon, Magallanes, Manalili, Jakosalem, Plaridel, Leon Kilat, ug Sanciangko.

Sa pagka-karon, ang vendors gihatagan og trial time sa pagpamaligya gikan sa alas 9:00 sa buntag hangtud sa alas 8:00 sa gabii. BDB (BANATNEWS)