Armas ni Coleta gipaubos na sa ballistic examination

CEBU, Philippines — Ang Cebu City Police Office padayon sa pagpalawom sa ilang imbestigasyon kalabotan sa pagpakamatay ni Police Staff Sergeant Celso Coleta.

Si Coleta ang gipasanginlan ni Ritche Myles Nepomuceno kinsa gipusil patay sa niadtong Lunes sa gabii diha sa Barangay Basak-Pardo nga nilugos kaniya ug gikilkilan usab siya niini kuyog sa laing mga polis sa Sawang Calero Police Station.

Matud  sa hepe sa Cebu City Police Office Police Colonel Josefino Ligan nga ilaha nang gipadala ngadto sa crime laboratory ang armas nga gigamit ni Coleta sa pagpusil sa iyang kaugalingon alang sa ballistic examination.

Gibutyag ni Ligan nga ang maong armas dili kini ang servicer firearms ni Coleta ug buot nila nga masuta kong samang armas ba ang gigamit nga pagpusil patay kang Nepomuceno o posibleng ang nahisgutang arms gigamit sa ubang krimen.

Matud usab ni Ligan nga gisusi nila diin gikan ang maong armas tungod kay ubos man sa custodial si Coleta ug dili kini makagawas ug base sa record wala usab kini makagawas atol sa pagpatay ni Nepomuceno.

Si Ligan nimando kini sa imbestigador sa kaso nga makig-alayon sa bana ni Nepomuceno sa ilang pagpalawom sa imbestigasyon. Samtang si Cebu City Mayor Edgardo Labella nagkanayon nga angayan gyud nga susihon ang pagpusil patay kang Nepomuceno.

Gibutyag ni Labella nga nibisita kaniya ang  mga representante sa National Police Commission (NAPOLCOM) ug iyaha kining giawhag nga mohimo og lawom nga imbestigasyon labot sa maong hitabo.

Giawhag ni Labella ang pamilya ni Nepomuceno sa pag-adto sa iyahang buhatan tungod kay gimandoan naman niini si Atty. Rey Gealon, city legal officer nga mohatag og legal assistance sa pamilya sa biktima.

Giklaro ni Labella nga bisan og nalambigit og kontrobersiya ang 11 ka polis sa Sawang Calero Police Station aduna lang gihapon siya’y pagsalig sa PNP organization.

Matud niya nga dili kalikayan sa usa ka organisasyon nga adunay mga badlongon apan anaa gihapoy mga polis nga mga buotan ug tarong nga naghimo sa ilang trabaho. —Rowena D. Capsitrano/BDB (BANATNEWS)