Kaso sa Sugbu padayong nakaubos, Mayor Cortes positibo sa COVID-19
CEBU, Philippines — Padayon ang paggamay sa gidaghanon sa mga bag-ong kaso sa Covid-19 sa Cebu City sud sa nakalabay nga mga adlaw sukad nga misirit kini og saka pagsulod sa bulan sa Enero ning tuiga.
Base sa datos nga gipagawas sa DOH-7 natala kagahapon ang labing ubos nga new cases sa COVID-19 sa Cebu City nga naa lang sa 33.
Ang Cebu City karon duna nay 21, 882 total cases sa COVID-19 ug naa sa 1,272 ang active cases.
Samtang 93 sab ang dugang nangaayo na gikan sa maong sakit ug misumada na kini karon og 19,793 recoveries apan dunay usa nga nadugang sa mga nakalas.
Ang Mandaue City nakatala og 21 ka bag-ong kaso sa COVID-19, ang siyudad karon duna nay 5,827 total cases ug naa sa 840 ang active cases.
Hinoon nakatala og sila og 42 ka dugang nangaayo.
Apan lakip sa mga napositibo mao ang ilang mayor nga si Jonas Cortes human nigawas ang resulta sa swab test niini niadtongt Lunes Abril, 5, 2021
Sa iyang post sa Facebook, si Cortes mipahibalo bahin sa naobserbahan niyang mga sintomas sa maong sakit maong nagpa swab test kini ug nianang Lunes sa hapon migawas ang resulta nga nag-ingong positibo siya sa maong virus.
Si Atty. John Eddu Ibanez, executive secretary ni Cortes, miingon nga ang mayor nakabatyag og pagkarat sa tutunlan maong nagpa swab test kini dayon.
Si Cortes miawhag sa mga Mandauehanon nga dili mahadlok nga magpabakuna ug ipadayon ang pagsunod sa mga health protocols.
Si Ibañez miingon nga lakip sa nagpa swab test ang asawa sa mayor nga si Sarah Cortes apan negatibo kini.
Ang mayor kasamtangang nag-home quarantine sugod sa miaging adlaw ug wala na mosagol sa iyang mga kabanay.
Samtang ang Lapu-Lapu City nakatala og unom ka bag-ong kaso. Ang dakbayan dunay 5,691 total cases apan 785 lamang niini ang active cases.
Si Mayor Junard Chan sa Dakbayan sa Lapu-Lapu malaumon nga ma zero cases na sila na unya ini og selebrar nila sa ika-500 nga kasumaran sa Kadaugan sa Mactan karong Abril 27.
Si Chan nanawagan sa mga Oponganon nga ipadayon ang pagsunod sa health protocols ug dili magkumpiyansa.
Sa datos sa DOH-7 ang Central Visayas dunay 50,582 total cases; naa sa 4,489 ang active cases; 44,274 ang recoveries ug 1,819 ang nakalas.— Romeo Limpangog ug Rowena Capistrano/IBM (BANATNEWS)
- Latest
