Nangilkil sa contractor nasikop sa entrapment
CEBU, Philippines — Duha ka tawo sikop atol sa gipahigayong entrapment operation sa Regional Intelligence Division (RID)-7 diha sa Cross Roads, Barangay Banilad, Dakbayan sa Sugbo niadtong Martes sa gabii.
Giingoang ang mga suspetsado nangayo ug kwarta sa contractor gamit ang pangalan ni Atty. Floro Casas Jr., Cebu City Administrator.
Ang mga suspetsado mao sila si Marythel Nicollete Niere, 34-anyos, minyo, taga Palm Hills, Subdivision, Barangay Basak, Dakbayan sa Mandaue ug Reihan Huni, 32, ulitawo, nagpuyo sa usa sa mga pension house sa Barangay Parian, Dakbayan sa Sugbo.
Nangulo sa maong entrapment operation si Police Major Glenn Hife human si Casas nagpakitabang kanila ug nipasangil nga gigamit sa mga suspetsado ang iyang pangalan sa pagpangilkil niini og P5 mil ngadto sa usa ka contractor sa proyekto sa Cebu City Hall. Nasakmit sa kapolisan gikan kang Niere ug Huni ang P10 mil nga boodle money, cellphone, sakyanan nga gigamit sa mga suspetsado ug nagkadaiyang klase sa identification card (ID).
Ang mga suspetsado natingkagol karon sa detention cell sa Cebu City Police Office. —BDB (BANATNEWS)
- Latest