CEBU, Philippines — Gikalipay ni Bise Mayor Alan Bucao sa Dakbayan sa Talisay ang giingong tinguha ni Mayor Gerald Anthony “Samsam” Gullas Jr. nga modagan sa kongreso sa sunod tuig nga piniliay.
Kini tungod sa posibilidad nga siya na ang modagan pagka mayor sa Talisay ubos sa partido nga Alayon.
Apan ang kasaligang tinubdan nag ingon nga dili suportahan sa mga barangay kapitan si Bucao kun modagan kini pagka mayor.
Gitug-an sa maong impormante nga nakighinabi ang mga kapitan ni mayor Gullas ug nipadayag nga ilang gusto magmayor sa Talisay ubos sa Alayon mao ang asawa niini nga si Rhea.
Nasayran nagplano si Mayor Gullas nga modagan sa kongreso nonot sa pag-retiro na sa iyang apohan nga si kongresista Eduardo Gullas. Si Bise mayor Bucao kinsa mao karon ang acting mayor mipatawag og tigum sa mga kapitan sa Talisay aron pahugtan nila ang pagpatuman sa health protocols.
Apan sa iyang mensahe nilakbit kini sa paghangyo nga unta dili lang sa maghisgot og politika.
Human sa pakigtigom ni Bucao sa mga kapitan nag post kini sa iyang Facebook Account ug naghisgut nga wala siya makatulog ug nakapangutana kun unsay iyang sala. Hinoon wala na modetalye pa ang bise mayor kun unsay nakahasol sa iyang huna-huna. —MEL (BANATNEWS)