Pagpasud sa TPUJs sa silingang siyudad padayong gitun-an

CEBU, Philippines — Ang Chairman sa Cebu City Jeepney Task Force Cebu City Konsehal James Anthony Cuenco mibutyag nga sa katapusang bahin ning semanaha mohimo sila og assessment sa dagan sa mga Traditional Public Utility Jeepneys(TPUJ) sa siyudad.

Mag-agad sa resulta sa assessment ang desisyon kun tugotan ang ubang mga TPUJs gikan sa laing mga lugar sama sa Talisay, Mandaue ug Lapu-Lapu makasulod sa dakbayan sa Sugbo. Way problemang nabantayan pagbalik sa TPUJs sa siyudad apan nagpaabot pa gihapon sila sa uban pang mga drayber o operators nga magparehistro ug magpa-inspeksyon sa ilang mga sakyanan.

Dunay 700 nga nagparehistro apan 168 lang ang nakapasar.

Samtang 200 ka IDs sa Balik Pasada IDs na ang napagawas apan 79 palang ang ni -claim niini mao nga kuwang gihapon ang nagdagan nga TPUJs karon sa siyudad.

Sa pikas bahin, misuwat kang Cuenco ang Vallacar Transit Inc.  nga maoy nagdumala sa mga Ceres Bus nga nihangyo nga  i-exempt sila sa pagkuha og travel line ug ID nga giisyu sa Cebu City Transportation Office (CCTO).

Gipahimug-atan sa  management sa Ceres Bus nga temporaryo ra ang pagbiyahe nila sa mga kadalanan sa Siyudad sa Sugbo kay mobalik ra sila puhon sa probinsya hinungdan nga nihangyo sila nga dili na lang unta sila pakuhaon sa mga rekisitos nga kuhaon sa CCTO.

Apan si Cuenco miingon nga dili siya makahukom niini ug iyaha kini nga gi-endorse ngadto sa konseho aron maoy mosusi sa hangyo sa management sa Ceres.– Sanden J. Anadia/IBM (BANATNEWS)