DepEd-7 mosusi nganong dunay mga estudyante sa SMB Escapade
CEBU, Philippines — Ipasusi ni DepEd-7 regional director Salustiano Jimenez ang report kalabot sa mga tinun-an nga nisugat sa mga bisita sa Sta. Fe –Madridejos- Bantayan (SMB) Escapade niadtong Nobiyembre 27 didto sa Kota Park sa Lungsod sa Madridejos.
Ang maong kalihokan unod karon sa mga pamantalaan ug balita nunot sa matud pa paglapas sa health protocols sa mga tawong nanambong, ug nakita sa mga hulagway nga dunay daghang mga tinun-an nga nakauniporme pa.
Sumala pang Jimenez ilang i-verify ang maong report sa dili pa siya mohimo og proseso ug pangayoan og report ang mga school officials sa maong dapit.
Ang DepEd nipatuman og distance learning pinaagi sa modules ug online learning tungod sa hulga sa Covid-19 aron dili mag-abot ang mga bata sa tunghaan.
Si Jimenez nanawagan sa mga ginikanan pahimangnoan kanunay ilang mga anak sa health protocols ug ilikay kini sa mga kalihokan nga maghatag og hulga sa ilang panglawas.
Sayo pa , giangkon ni Madridejos Mayor Salvador Dela Fuente nga naglisod sila sa pagkonrol sa mga tawo human kalit kini nga nidugok. Nitambong sa maong kalihokan silang Presidential Spokesperson Harry Roque , Gobernador Gwendolyn Garcia, OPAV Secretary Michael Dino ug mga kandidata sa Miss Universe Philippines 202.
Ang maong hitabo gipaimbestigar ni Department of Interior and Local Government (DILG) Secretary Eduardo Año human niulbo ang report nga matud pa wala nituman sa social distancing ang mga tawo. —IBM (BANATNEWS)
- Latest