20-anyos sikop sa buybust sa Carbon Police

CEBU, Philippines — Nasikop ang usa ka 20anyos nga high value individual human sa gipahigayon nga buy bust operation sa mga tinugyanan sa Carbon Police Station sa may Sitio Bato, Barangay Ermita ning Dakbayan sa Sugbo, alas sayes sa gabii adlaw nga sabado.

Ang nasikop naila nga si Alex Castro Jr, residente sa maong barangay.

Nangulo sa maong operasyon mao si Police Captain Alvin Llamedo, hepe sa Carbon Police Station uban sa mga ginsakopan niini.

Nasakmit gikan sa dinakpan ang mga pinutos sa ginadili nga drugas nga motimbang ug 30gramos nga mobalor ug 204 mil ka pesos base sa dangerous drug board value ug buy bust money.

Matud pa ni Llamedo, ang pangalan ni Castro tunog kaayo matag higayon aduna silay madakpan nga tawo nga nalambigit sa ginadili ng drugas.

Nataod-taoran una nadakpan si Castro tungod kay dinagko ang order niini kinsa makadispatsar ug 100 grams matag semana.

Gitan-aw pa karon sa kapulisan ang giingong kontak ni castro sulod sa prisohan nga maoy giingong tinubdan sa ginadili nga drugas

Ang dinakpan nagtingkagol na sa bilangguan ug gipaabot ang pagpasang-at ug tukma nga kaso batok niini. /MEL (BANATNEWS)