110 sikop sa kalapasan sa quarantine protocol
CEBU, Philippines — Nadakpan ang 110 ka tawo kutob udto kagahapong adlawa sa nagkadaiyang lugar sa Dakbayan sa Sugbo gumikan sa mga kalapasan sa general community quarantine (GCQ) protocols.
Kini ang gipahibawo sa pangulo sa Prevention Restoration Orderly Beautification and Enhancement (PROBE) Team sa siyudad nga si Raquel Bohol-Arce nga nahinabi sa Banat News.
Ang mga nadakpan kadaghanan kanila mga walay quarantine pass nga nigawas sa ilang mga panimalay kay adunay mga gipamalit.
Aduna usab mga nadakpan ang wala nagsul-ob og facemask ug wala nituman sa mga health protocols sama sa pagsunod sa social distancing ug uban pa.
Ang mga nadakpan gidala sa Plaza Independencia alang sa gipahigayon nga seminar ug community service sama sa exercise.
Kung mahinumduman si Mayor Edgardo Labella nitugot na nga makagawas ang katawhan sa adlaw nga Domingo basta seguruhon lang ang pagdala sa mga quarantine pass ug wala nay number coding basta importante lang ang ilang mga buhaton ug lakip usab ang pagsimba. /GMR (BANATNEWS)
- Latest