434 LSIs niabot, 1,443 nakagawas sa Sugbo
CEBU, Philippines — Anaa na sa 434 ka locally-stranded individuals ang naabot sa Sugbo samtang naa sab sa 1,443 ka LSIs ang nakagawas na paingon sa laing probinsiya.
Matud ni Konsehal Joel Garganera sa Dakbayan sa Sugbo ug deputy chief implementer sa Inter-Agency Task Force (IATF) Emergency Operations Center (EOC) Cebu City, nga base kini sa lista sa Philippine Coast Guard 7.
Ang maong lista gikan kini sa Agosto 2, 3, 4 ug 5, upat ka adlaw nga pagdawat ug pagpagawas sa kagamhanan sa Dakbayan sa Sugbo sa mga LSI nga natanggong sa dakbayan ingon man sa nagkalain-laing lugar sa Pilipinas.
Kahinumduman nga duna nay mga LSIs nga nakauli ug nakagawas na sa Sugbo human ang dakbayan gipaubos na sa general community quarantine sugod niadtong Agosto 1.
Sukad nga ang Dakbayan sa Sugbo gipaubos sa GCQ sa Inter-Agency Task Force gisugdan dayon ang paghatag og financial assistance ngadto sa mga LSIs.
Gi-categorized sa Cebu City Department of Social Welfare and Services ang pahatag og financial assistance sama kun mobiyahe lang sa Probinsiya sa Sugbo naa sa P1,000 ngadto sa P1,500 ang ihatag.
Kun motabok na og dagat sama sa moadto sa Negros naa sa P1,500 ngadto sa P2,000 ang ihatag sa matag pasahero apan kun molabang sa Mindanao o Manila naa sa P5,000 nga ayuda ang mahatag.
Gikuha sa DSWS sa Aid for Individual in Crisis Situation ang budget alang sa financial assistance sa mga LSIs. /GMR (BANATNEWS)
- Latest
