Daghang badlungon ubos sa GCQ
Decemay P. Padilla (Banat) - August 5, 2020 - 12:00am

CEBU, Philippines — Sa ikaupat ka adlaw sukad gipaubos sa general community quarantine ang Dakbayan sa Sugbo, nabantayan sa Prevention Restoration Order Beautification Enhancement (PROBE) Team nga ang mga tawo daw nakabuhi sa kwadra sa pagsige og gawas-gawas.

Sukad niadtong Agosto 1 hangtud kagahapon Agosto 4, daghan gihapon ang nadakpan sa kalapasan sa GCQ guidelines. Kagahapon gikan sa alas 6 sa buntag hangtud pasado alas 8 sa buntag niabot sa 117 ang nadakpan kinsa gidala sa Plaza Independencia aron i-seminar ug mohimo og community service.

Matud sa pangulo sa PROBE, Raquel Arce, nga sa pagsugod sa GCQ sa siyudad, ang average nga madakpan nila sa usa ka adlaw maabot sa 250 ka tawo.

Sagad sa kalapasan mao ang paggawas sa ilang panimalay bisan og dili pa ilang adlaw unta nga mogawas sa rason nga mopalit og pagkaon ug nagtuo nga wala nay quarantine pass. Usa ka 70-anyos nga si Aida Vergara nga taga Barangay Mambaling giingong gidakop sa polis samtang mangayo lang unta og kaon sa iyang anak kay wala siyay’ kwarta. Sa Executive Order No. 86 ni Mayor Edgardo Labella, ang mga nag-edad og 21-anyos paubos ug 60-anyos pataas gidid-an nga mogawas sa panimalay.

Sukad gipaubos sa GCQ ang Dakbayan sa Sugbo, lapas sa 1,000 na ang tanang nadakpan.

Matud ni Arce nga tanang nadakpan pulos mga unang nakalapas sa GCQ protocols. Giawhag ni Arce ang katawhan nga kung wala silay importante nga lakaw ug kinahanglanon sa gawas mas maayo magpabilin nalang sa ilang balay kay mao kini ang bugtong nilang matabang sa padayon nga gubat batok sa COVID-19.

Samtang sa Dakbayan sa Mandaue, niabot na og 1,180 ka tawo ang nadakpan sa paglapas sa quarantine rules sukad niadtong Marso hangtud Agosto 1.

Matud ni Atty. Eddu Ibañez, city public information officer, nga naglakip sa kalapasan mao ang curfew ug ingon man ang dili pagsul-ob og face mask sa paglakaw.

“Mao lang pud ang akong hangyo nga di ta ganahan nga moabot og ingon ana nga madakpan unya mobayad og penalty…Gamay ra gyud kayo nga pabor ang among hangyo, magsul-ob og mask, dili maglakaw-lakaw ug malapas sa curfew,” matud ni Ibañez. Rowena D. Capistrano ug Romeo T. Limpangog/GMR (BANATNEWS)

GCQ
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with