2 sikop sa tigbakay ug 65 sikop nga wala magsul-ob og facemask

CEBU, Philippines — Duha ka tawo nasikop sa kapolisan  dihang naaktuhan nga nagsugal og tigbakay  sa Barangay  Pilipog, Lungsod sa  Cordova  niadtong Domingo  sa hapon.

Si Police Lieutenant  Jan Ace Elcid  Layug hepe sa Cordova Police Station miila sa mga nadakpan nga sila si Casiano Nadal, ug  Ariel Zaraga hingkod ang panuigon nga pulos nagpuyo sa Sitio Tumoy sa Barangay  Ibabao  sa maong lungsod.

Matud pa ni Layug nga nakadawat sila ug taho labot sa gipasiugdahan  nga tigbakay  sa maong dapit sa Barangay Pilipog hinungdan nga ilang gihimo ang pagpangronda.

Atol sa pagronda wa kaipsot si Nadal ug Zaraga dihang maoy naggunitan sa mga polis samtang nagkatibuwaag sa pagpanagan ang ubang mga  nagsugal.

Nakuha gikan sa mga dinakpan  ang duha ka  manok nga adunay   gitaod  nga tari ingon  man pusta sa manok  nga padulong na unta nga itari.

Samtang sa laing bahin mokabat sa 65  ka mga tawo ang nasikop sa kapolisan sa Lapu-lapu  nga wala magsul-ob  sa ilang face  mask ingon man wa magdala ug quarantine pass.

Kini ang nasayran gikan ni Captain Perceval Miasco sa City Intelligence Branch (CIB) sa Lapu-lapu City Police Office.

Sa nasayran hugot nga gipatuman ni  Mayor Junard  Ahong Chan ang pagsul-ob og face mask  nga maoy gilatid sa Executive Order No 15-068-H  nga nagmando ug mandatory nga pagsul-ob ug face mask samtang gipaubos ang dakbayan sa general community quarantine. /MEL (BANATNEWS)