190 ka bus gitugotang makabiyahe sa Probinsiya sa Sugbo

CEBU, Philippines — Nikabat na ngadto sa 190 ka bus ang gitugotang makabiyahe sa Probinsiya sa Sugbo karon nga ubos na kini sa general community quarantine (GCQ).

Ang Land Transportation Franchising and Regulatory Board (LTFRB)- 7 niisyu kini og special permits sa 93 ka buses alang sa mga dapit sa amihanan ug 92 alang sa mga dapit habagatan ug lima sa mid-west aron maka-operate na kini ug makahakot sa mga pasahero.

Base sa report sa Sugbo News nga gawas sa permit sa LTFRB ang Probinsiya sa Sugbo niisyu usab kini og Provincial Public Utility Passes (PPUP) ngadto sa maong mga bus aron mobiyahe sa rota gikan sa Dakbayan sa Talisay padulong  sa mga lungsod sa Samboan, Balamban, Pinamungajan, Asturias, Barili, Dakbayan sa Carcar, mga lungsod sa Dumanjug ug Sibonga.

Samtang sa amihanan gikan mga lungsod sa Consolacion ngadto Tabuelan, Tuburan, Bogo City, Maya sa Daanbantayan, Lambusan sa San Remigio via Hagnaya, ngadto sa Bantayan Island.

Ang temporaryo nga bus terminal sa habagatan nahimutang diha sa Lantaw Restaurant sa Cebu South Coastal Road samtang sa habig sa amihan diha sa usa ka lugar sa Lungsod sa Consolacion ang gihimong temporaryo nga terminal.

Apil sa mga bus nga gi-deploy mao ang gikan sa Vallacar Transit, Arellano Brothers, JS Calvo, Geral Transport, Julito and Liezl Flores Transit, CP Corominas, YSL Transportation, New Librando Transportation, Chan Transit, RLLC Bus Liner Inc., Calvo Transport Group, Cebu San Sebastian, ug Cebu Provincial Operators Transport Cooperative.

Ang maong mga bus kinahanglan mosunod sa health protocols sama sa 50-percent seating capacity, physical distancing pagsul-ob og facemasks ug sanitation.

Ang Kapitilyo nihatag usab kini og PPUP sa 55 ka taxi nga nagdagan sa Lungsod sa Consolacion, Compostela ug Danao City. /BDB (BANATNEWS)