Delivery, ambulansiya gigamit sa palusot
![Delivery, ambulansiya gigamit sa palusot](https://media.philstar.com/photos/2020/04/17/gwen_2020-04-17_22-50-27.jpg)
CEBU, Philippines — Buot si Gobernador Gwendolyn Garcia nga mas istriktuhon ang pagsusi sa mga delivery trucks ug ambulansya mga mosulod ug gawas sa Dakbayan sa Sugbo padulong ngadto sa kalungsuran. Kini human nakadawat og taho nga adunay pipila nga molusot pinaagi sa ambulansya ug delivery trucks ug mobayad lang og P200 ngadto sa P500.
Buot ni Garcia nga susihon pag-ayo sa mga polis ang maong mga sakyanan aron maseguro nga walay makalusot ilabi na nga risgo tungod kay posible ang nilusot nagdala sa virus ug mokatap na kini ngadto sa mga lungsod.
Si Garcia nimando kang Cebu Provincial Police Office director, Colonel Roderick Mariano, sa pagpahugot sa mga checkpoint.
Matud ni Garcia nga tungod sa nagsaka nga kaso sa COVID-19 sa Dakbayan sa Sugbo hayan nga daghan ang mangadto una sa probinsiya.
Giklaro ni Garcia nga mag-atubang gyud og tukma nga kaso ang mga drayber nga masakyan.
Tuyo sa gobernador nga mapugngan ang sakit nga COVID-19 nga makasulod sa Probinsiya sa Sugbo. Rowena D. Capistrano/GMR (BANATNEWS)
- Latest