150 ka tawo nga nakalapas sa curfew ug ECQ gipasaylo

CEBU, Philippines — Gipasaylo ang 150 ka tawo kinsa nakahimo og kalapasan sa unang higayon sa curfew ug enhanced community quarantine sa Dakbayan sa Lapu-Lapu.

Ang mga nasikop sa wala pa kini pasayloa ug pagawasa sa kapolisan gikan sa detention cell gipaubos una sila sa pipila ka oras nga lecture aron sila pasabton sa ilang nahimong kalapasan sa ordinansa ug executive order sa ECQ nga gipatuman sa lokal nga kagamhanan aron mahunong ang pagkuyanap sa coronavirus disease.

Si Police Colonel Clarito  Baja, direktor sa Lapu-Lapu City  Police Office (LLCPO) ang nipahimangno ngadto sa maong mga  dinakpan nga likayan nga madakpan sa ikaduhang higayon nga kalapasan.

Matud ni Baja nga uban sa maong mga dinakpan nagdala kini og ECQ pass nga dili ilaha ang nabutang nga pangalan ug ang uban nasikop tungod kay naglaroylaroy kini.

Nunot sa paghatag  og pasaylo  sa kapolisan  sa maong mga  dinakpan  wala  na usab sila makabayad sa P1,000  nga multa isip silot sa unang kalapasan. Samtang sa Barangay Talamban, Dakbayan sa Sugbo giparosaryo ang mga nakalapas sa ECQ.

Matud ni Sangguniang Kabataan chairwoman Christine Claire Bontuyan nga adunay mga concern citizen ang motawag sa ilaha o mo-chat kalabutan sa oras diin magtapok-tapok ang mga tawo usahay adunay mga menor de edad. Si Bontuyan nagkanayon nga dili pugsanay ang ilang pagpaampo apan mao kini ang kanunay nilang gibutyag nga ang pag-ampo maoy pinaka importante nga hinagiban ilabina dha sa ilang barangay adunay tulo ka konpirmado nga kaso sa covid-19.

Gipasabot ni Bontuyan nga tumong nilang ang mga tawo magpundo kini sa ilang mga balay tungod kay dili makita ang virus ug kinahanglang ang tanan mopailob ug mosakripisyo una.

Dugang ni Bontuyan nga kadtong mga dagko kaayo og kalapasan ilaha kining iduso sa Talamban Police Station diin nahisakop ang ilang barangay. Rowena D. Capistrano/BDB (BANATNEWS)