CEBU, Philippines — Gitataw sa manager sa Cebu South Bus Terminal nga adunay biyahe sa mga bus padulong sa mga lungsod sa habagatang bahin sa Lalawigan sa Sugbo.
Matud ni Carmen Quijano nga ang wala ray biyahe mao ang mga bus nga mogawas sa Probinsiya sa Sugbo. “Ang wala nay biyahe kay katong padulong Zamboanga ug Negros kay dili naman kalawig tungod aning coronavirus disease,” matud ni Quijano.
Nabantayan hinoon sa kadagkuan sa terminal nga sukad pa niadtong Biyernes sa hapon nagkaminus na ang mga tawo nga nibiyahe hangtud nga mingaw na kaayo pag-abot sa weekend ug hangtud karon.
Samtang gitataw sab ni Gob. Gwendolyn Garcia nga kadtong gikan sa mga isla sama sa Bantayan, Camotes, Malapascua, Carnaza ug bisan asa nga isla sa lalawigan ang makabiyahe pa gihapon padulong sa mainland Cebu tungod kay dili kini cover sa restriction of entry nga gipatuman.
“If gikan ka sa Leyte unya moadto ka sa Pilar, covered naka sa ban. If gikan ka sa Cadiz to Polambato Port in Bogo City, covered na sad na,” matud ni Garcia.
Si Garcia niawhag usab sa mga local government units ug sa publiko sa mga isla nga motabang sa pag-monitor sa ilang lugar kun adunay moabot nga gikan sa laing probinsiya. Kini human nga nakadawat og report si Garcia nga adunay gikan sa Estancia, Negros Occidental nga niabot sa Bantayan Island.
“Help us seal our coastlines. Tabang mo, ayaw mo sige ra og sumbong. I-report dayon na sa police or sa mayor. Ayaw nang kutob ra og tagawtaw or i-report sa Facebook,” matud ni Garcia. /GMR (BANATNEWS)