Duha ka pasilidad sa Kapitolyo paabangan

Cebu, Philippines- Duha ka pasilidad sa Kapitolyo nga giingong wala na gamita ang gikatakdang paabangan kini alang sa dugang kita sa probinsiya.

 Ang Cebu Provincial Women and Children Development Center (CPWCDC) diha sa Sitio Sudlon, Barangay Lahug, Dakbayan sa Sugbo ug ang Cebu Provincial Skills Training Center (CPSTC) sa Barangay Inayagan, Dakbayan sa Naga maoy paabangan.

 Ang CPWCDC mao kini ang pasilidad nga alang sa mga batan-on ug mga babaye nga biktima sa pang-abuso samtang ang CPSTC maoy training center sa massage therapy, beauty parlor, dress making ug tailoring.

Ang trabaho sa CPWCDC ug ingon man ang My Home Center sa Barangay Tayud, Lungsod sa Consolacion mao ang pasilidad sa Children in Conflict with Law (CICL) buot usab nga i-turnover ni Garcia ngadto sa Department of Social Welfare and Development (DSWD).

Matud ni Garcia nga ang Kapitolyo mo gasto og P375,000 kada bata matag tuig nga gilangkuban sa sweldo sa house parents niini, mga gikinahanglan sa mga bata sama sa pagkaon, sabon ug uban pa.

Samtang sa Women and Development Center mokabat sa P200 mil ang magasto sa Kapitolyo.

 Matud usab ni Garcia nga dako na unta ang magamit sa maong mga pundo alang sa mga kababayen-an ug kabataan.

Ang My Home aduna kini 11 ka bata ug 20 ka kabayen-an diha sa Women and Development Center diin gipapauli na kini sa Kapitolyo niadtong ulahing semana sa buwan sa Septiyembre niining tuiga.