Barangay tanod, kasosyo sikop sa drug bust

CEBU, Philippines – Usa ka barangay tanod ug ang giingong kasosyo niini sa negosyo sa illegal nga drugas ang nadakpan sa buy-bust operation niadtong Miyerkules sa gabii sa Barangay Punta Princessa, Dakbayan sa Sugbo.

Ang dinakpang tanod giila sa kapolisan nga si Jose Canoy Jabonero 70, residente sa sitio Tuburan sa maong barangay kinsa high value target sa kapolisan ug anaa sa drug watch list sa Labangon Police Station. Samtang ang gikatahong kakunsabo niini giila nga si Maria Delbo nadakpan sab. Ang duha nakuhaan og P60 mil nga kantidad sa gidudahang shabu.

Ang hepe sa Labangon Police Station nga si Police Major Henrix Bancoleta nagkanayon nga nakadawat sila og impormasyon nga tigpayuhot og shabu ang maong tanod maong gihimo ang surveillance ug gilusad dayon ang operasyon.

Didto ra nila nadiskubrehan nga partner sila ni Delbo sa maong illegal nga negosyo.

“Si Jabonero ang mohatag sa butang (sa drogas), unya ang babaye maoy mokuha sa bayad,” sigun niini.

Butyag sa maong hepe nga tago mamaligya si Delbo maong wala kini makuha sa monitoring ug intelligence gathering sa kapolisan. Ang bana ni Delbo una nang nadakpan sa kapolisan tungod gihapon sa kaso sa drugas ug anaa na kini karong sa Cebu City Jail.

Samtang unom sab ka motorista ang nadakpan sa mga sakop sa Presinto 1 sa Mandaue City  Police Office (MCPO) sa ilang checkpoint diha sa A. Soriano Avenue sa Barangay  Centro, Dakbayan sa Mandaue sa miaging gabii.

Si Police Chief  Master  Sergeant  Renato  Canja sa Presinto 1 miila sa ilang nadakpan nga mao sila si Jervy  Lobrino, 40, Kerby  Merin, 24, Richard Presbetero, 21, Marquin Aying, 24, Celso  Loceranas, Angel  Sabadlo, 20, ug Gerry Villaber, 34.

Matud  pa ni Canja pulos nagsakay og motorsiklo gikan sa Dakbayan sa Sugbo sa dihang sila gipara ug nasakpang nagdala og illegal nga drugas.

Sa Talisay City, nadakpan sab ang naapil sa drug watchlist nga si Kim Bacus Ocarisa taga Sitio Mahayahay, Barangay Candulawan kagahapon sa alas 12:20 sa udto.

Matud pa ni Police Captain Nazarino Emia, deputy chief sa Talisay City Police Station nga mga silingan sa suspek ang nireklamo batok sa iyang pagpamaligya og shabu sa ilang lugar.

Nakuha gikan kaniya ang 17.007 gramos nga adunay balor nga P115,647. (Rowena Capistrano, Gabriel Bonjoc, Romeo T. Limpangog ug reports, Jenny Luz R. Tejas ug Noreen Rose C. Vilchez /IBM )(BANAT NEWS)