CEBU, Philippines — Si Bureau of Fire Protection-7 director Gilbert Dolot uban pang mga opisyales, nagpahigayon og pinirmahay tali sa mga aplikante pagkabombero nga magtinabangay aron masumpo ang kurapsyon nga motumaw ilabi na ngadto sa buot mosulod sa maong buhatan, kini human adunay nadakpan sa Lungsod sa Sibulan, Negros Oriental nga usa ka babayeng sibilyan nga nangilkil og mga aplikante sa BFP.
Si Dolot, miawhag sa mga aplikante nga magtinabangay pinaagi sa pagtaho ngadto kanila sa higayon nga adunay mangilkil aron makasulod sa BFP.
Nasayran nga niadtong Mayo 11, usa ka Maria Nilda Maniwang, ang nasikop sa entrapment operation sa kapolisan sa Negros Oriental, human kini nangilkil og P150 mil ngadto sa usa ka aplikante ug mipasalig nga makasulod sa hanay sa BFP.
Sumala pa ni Dolot, mapasalamaton siya kay maisogun usab ang maong aplikante ug mitaho sa kapolisan nga miresulta sa maong operasyon.
Dugang sa direktor nga dili lang usa ang nabiktima ni Maniwang kay aduna pay laing duha ang mipatim-aw diin usa kanila taga Bohol.
Gitug-an ni Dolot nga sa ilang nasayran, tag P150 mil gyud ang pangayo ni Maniwang sa mga aplikante mao nga gisusi nila kini karon kon aduna ba kini kakunsabo sa sulod mismo sa BFP.
Hinungdan nga giawhag niini ang mga aplikante nga mosunod lang sa proseso ug dili mobayad kay sila sa BFP, mipatuman sa patas nga pagpili sa makasulod.
Gipahimangnuan usab ni Dolot ang mga mohimo og pagpangilkil sa mga aplikante nga mohunong na sa maong binuhatan kay dili sila magpanuko og pasaka og kaso niadtong masakpan. (/DILT)(BANATNEWS)