Tomas nangayo og extension sa Ombudsman

CEBU, Philippines — Mihangyo si Cebu City Mayor Tomas Osmeña og extension aron mohatag siya og tubag ngadto sa Office of the Ombudsman Visayas sa kasong iyang giatubang kalabot sa pag-implementar sa Long Life Medical Assistance Program (LLMAP).

Sa iyang mosyon, ang mayor miingon nga ang iyang kampo nakadawat sa order nga nagdirekta kaniya nga motubag sa kasong kriminal ug administratiba niadtong Marso 27 apan si City Attorney Joseph Bernaldez, ang abogado sa mayor, miingon nga ang iyang opisina nakadawat sa order niadtong Abril 4.

“Due to the pressures of equally urgent professional work and prior commitments, the undersigned counsel needs more time to prepare the counter-affidavit,” matud ni Bernaldez.

Dugang niya nga ang pag-file sa maong motion walay bisan unsang intensyon aron malangan ang disposisyon sa kaso.

Kahinumduman nga si Barangay Apas Councilman Ramil Ayuman miakusar kang Osmeña sa paggamit sa mga out-of-school youths aron paghatag sa mga tambal alang sa mga benepisyaryo sa LLMAP.

Matud ni Ayuman nga ang mayor mahimo unta nga mogamit sa kasamtangang mga barangay health workers kinsa mga trained sa pag-implemenar sa health care services.

Tungod niini, gi-akusahan ni Ayuman ang mayor nga mihimo og graft, gross neglect of duty, ug conduct unbecoming of a public official.

Giderektahan ni Deputy Ombudsman for the Visayas Paul Elmer Clemente si Osmeña  nga mosumiter og counter-affidavit sa kasong iyang giatubang.

Ang LLMAP mao ang unang programa ni Osmeña sa dihang siya mi-asumer sa buhatan niadtong Hunyo 2016. Usa kini ka programa sa siyudad sa pag-apud-apod sa libreng tambal alang sa mga residente sa siyudad nga nag-antos sa hypertension, diabetes, ug arthritis.

Kapin na sa 50 mil ka mga benepisyaryo matag adlaw ang nakadawat og medisina nga natala sa kagamhanan. (/DILT)(BANATNEWS)