Mga balay ug commercial building ugdaw sa sunog
CEBU, Philippines — Mokabat ngadto sa P2 milyones ang danyos sa nahitabong sunog nga niulbo diha sa Barangay Poblacion, Lungsod sa Badian niadtong Martes sa gabii.
Nadawat sa kabomberohan sa Lungsod sa Moalboal ang alarma sa sunog pinaagi sa chat ni Zar Villagonzalo kinsa residente sa Lungsod sa Badian alas 8:48 sa gabii ug dali kining girespondehan sa kabomberohan.
Matud ni Senior Fire Officer 3 Ruseller Generalao, fire marshal sa Lungsod sa Moalboal nga sa pag-abot nila sa lugar dako na ang kayo sa sunog hinungdan nga giisa dayon nila kini ngadto sa second alarm.
Ang kayo sa sunog nakontrolar alas 9:38 sa gabii ug alas 9:55 hingpit nga na fire out.
Si Generalao nagkanayon nga duha ka residential ug lima ka commercial building ang hingpit nga naugdaw sa maong sunog.
Base sa imbestigasyon sa kabomberohan ang kayo sa sunog giingong nagsugod sa cooking area sa food trip apan atol sa pagpatawag sa mga nagdumala sa maong establishmento ang mga trabahante niini ang niabot sa buhatan ni Generalao ug nihimakak sa nahisgutang report.
Ang Badian ubos kini sa cluster sa Moalboal diin gitinguha nga karong tuiga ang maong lungsod mabutangan na og kaugalingon nga fire station.
Wala hinuoy natala nga naangol o nakalas atol sa maong sunog apan ang firetruck sa Lungsod sa Alegria nakaangkon ug gamay nga kadaut ang dapit sa pultahan niini human maigo sa nihagsa nga semento. (/BDB)(BANATNEWS)
- Latest
