Adunay sipyat ang search warrant

CEBU, Philippines — Ang kampo nila ni San Francisco Mayor Aly Arquillano ug Bise Mayor Alfredo “Al” Arquillano mikwestyon sa legalidad sa  pag-isyu sa search warrant gikan sa korte aron mahimo ang pagpangronda sa ilang ancestral house sa Brgy. Poblacion sa Lungsod sa San Francisco, Isla sa Camotes.

Ang naasoy nga search warrant gipagawas ni Judge Leopoldo Cañete sa  Regional Trial Court (RTC) Branch 59 sa Barili.

Atol sa operasyon nakuha nag nagkadaiyang armas lakip na niini ang AR-15 rifle, kalibre .45, .22 rifle ug pipila ka ammunition ug usa ka granada.  Si retired judge Meinrado Paredes ang legal counsel sa mga Arquillano nagkanayon nga mo-file sila og motion to quash ngadto sa Danao RTC.

“We will argue, we are going to prove that the search warrant is null and void because it was issued by a court without a territorial jurisdiction over the place where the crime was supposedly or allegedly committed,” matud ni Paredes.

Dugang sa kanhi huwes nga ang search warrant balido kini Abril 2 apan ang raid nahimo Abril 4 na.

Gitataw niya nga ang pag-file nila og motion to quash dili ang pagkwestiyon sa kredibilidad sa huwes apan posible nga aduna ray lapso nga maoy hinungdan sa pag-isyu niini sa search warrant.  Si Atty. Edmund Lao ang party lawyer sa Barug Alang sa Kauswagan ug Demokrasya (BAKUD) party nagkanayon nga sa wala pa ang aktwal nga pag-search sa panimalay sa mga Arquillano, gilibutan na kini og mga polis.

Asoy ni Lao nga mga alas sais ngadto sa alas siete sa buntag, gipagawas tanang tawo sulod sa panimalay ug nisulod ang laing hugna sa mga operatiba nga maoy nihimo sa pagsusi sa panimalay.

Si Paredes nga usa ka human rights lawyer, nakakita  kini og posibleng kalapasan sa tawhanong katungod human nga ang mga sakop sa pamilya mitug-an kaniya nga sa dihang misupak sila sa gihimong pa susi, usa sa mga personnel niingon nga “aron walay mga matay, patuo mo nako”.

Ang mga abogado sa mga Arquillano mihimakak usab nga gipanag-iya sa managsuon ang granada nga nakit-an.

Gihimakak usab nila nga adunay gi-hire nga mga armadong grupo kay matud pa ang sa miaging tuig, walay record nga gubot ang lungsod ug gani adunay maayong track record ang mga Arquillano.

Ang kampo sa Arquillano naninguha nga mapaspasan ang  ang pagsulbad sa kaso aron dili maparalisa ang ilang pangampanya kay ang managsuon parehong milansar  sa naasoy nga lugar. Matud ni Paredes nga politika maoy nakahimo niini hilabina nga panahon sa eleksyon. Kini midugang nga nagtuo ang mga Arquillano nga adunay mga pribadong indibidwal nga nagpaluyo niini apan wala lang nila gibutyag ang mga pangalan. (/DILT)(BANATNEWS)