CEBU, Philippines — Kuwang ang upat ka oras nga paglimpyo sa Guadalupe river nga gitambungan sa liboan ka mga volunteers kagahapon sa buntag.
Mokabat sa 30 ka toneladang basura ang nakolekta ug daghan pa ang nahabilin nga basura sa sapa.
Tungod niini, ang pangulo sa Cebu City Environment and Natural Resources Office nga si Nida Cabrera miingon nga gi-pull-out lang ang mga volunteers kay ang schedule sa clean-up nagsugod sa alas 6 sa buntag hangtud alas 10.
Matud ni Cabrera nga adunay clean-up karong Lunes ug ipaagi sa food-for-work.
“Gibiyaan namo nga wala mahuman og limpyo. Ubos sa tanang bridges, wala gyud mahurot ang basura kay grabe sa kadaghan,” matud niya.
Adunay walo ka estasyon nga gibutang atol sa clean-up diin ang labing hugaw mao ang ilawom sa mga taytayan sa B. Rodriguez, P. Del Rosario, Guadalupe, Sanciangko, ug Topaz.
Alang sa food-for-work karong Lunes, matud ni Cabrera nga adunay 50 ka sakong bugas ug 25 karton nga canned goods ang ipanghatag sa mosalmot sa pagpanglimpyo.
Diin kada tulo ka oras nga palimpyo, hatagan ang mosalmot og tulo ka kilong bugas ug unom ka de lata.
“Nakita namo nga daghan gyud manglabay og basura sa sapa. Mga 12 ka tawo ang na-issue-han og citation ticket kay bisag nanglimpyo mi didto, nanglabay gihapon,” asoy ni Cabrera kinsa midugang nga daghang balay nga walay septic tank ug deretso ang hugaw sa sapa.
Nunot niini, aduna silay himuon nga information dissemination ug education campaign sa mga namuyo kilid sa sapa. (/DILT)(BANATNEWS)