Pundo, kahimanan sa barangay di ipagamit sa kampanya

CEBU, Philippines — Nipahimangno ang Commission on Elections (Comelec) ngadto sa mga opisyal sa barangay nga dili gamiton ang pundo o resources sa barangay pagpabor sa usa ka kandidato.

Matud ni  Atty. Jerome Brillantes ang provincial election supervisor nga ang mga opisyal sa barangay sama sa kapitan ug konsehal mamahimo rang maka-endorso ug mangampanya og kandidato karong eleksyon.

“Ang gibawal lang kay during sa ilang candidacy nga dili sila mo-affiliate og partido or any official sa lungsod. Non-partisan sila. For campaigning during the campaign period, they can campaign especially to those who run nga barangay official nga nidagan. Wala may prohibition” matud pa ni Brillantes.

Apan ang gidili mao ang paggamit sa pundo ug kahimanan sa barangay alang sa pangampanya. Dili usab mamahimo nga mapugos sa mga incumbent officials ang mga barangay o bisan og kinsa nga botaran ang usa ka kandidato ug makaapekto sa paghatag og basic services ngadto sa mga konstituwente.

“Because they are compelled by law to deliver basic services. That is why naa tay gi-create nga barangay officials para dali ra ang pag deliver sa goods and services sa every barangay” dugang ni Brillantes.

Sa niaging katuigan, dili malikayan nga adunay uban nga migamit sa kahimanan sa barangay o lungsod sama sa sakyanan paghakot sa mga supporters pagbiyahe padulong sa campaign area kon asa ipahigayon ang pulong-pulong. Si Brillantes nipahimangno nga ang masakpan mamahimong mapasakahan og kaso nga kalapasan sa election law. (/DILT)(BANATNEWS)