Garganera pabor bawion ang landfill

CEBU, Philippines – Mipadayag si Konsehal Joel Garganera sa iyang suporta sa lakang sa executive department nga bawion ang ownership sa 15.2 hectares nga Inayawan landfill.

Si Garganera nga ilado nga kritiko sa kasamtangang administrasyon miingon ang siyudad mi-okupar sa maong propiyedad sa dugay nang panahon.

“I think the city is going to rectify. I think the city is pursuing it. That should be the case”, matud ni Garganera.

Una nang nabalita nga ang siyudad pinaagi ni Mayor Tomas Osmeña misang-at og adverse claim sa Cebu City Registry of Deeds alang sa reversion sa titulo nga nakapangalan sa usa ka Renato Senining.

Ang property matud pa napalit sa Golden Hectarage Corp. kang Senining nga dunay certificate title no. 107-2018000529.

Sa iyang bahin, si Mayor Osmeña miasoy nga ang siyudad nag-imbestigar pa niini ug modangop sab siya sa Office of the Solicitor General aron i-revert ang titulo pabor sa kagamhanan sa siyudad nga gigamit na sa siyudad sa dugay na kaayong mga katuigan. Ang kagamhanan mohimo og closure ug rehabilitation sa landfill aron pag-comply sa order subay na sa Writ of Kalikasan nga giisyu sa korte.

Kabahin sa pagpasirado mao ang rehabilitation mao ang clearing sa service road, construction sa perimeter fence sa landfill ug uban pa.

Matud ni Garganera ang city government mi-aprubar sa P36 million alang sa construction sa concrete perimeter fence sa lugar.

“Worst scenario, if dili gyud na atua, so, what’s the use of putting up a concrete and permanent perimeter fence? There is a kuan ba sa government that you cannot introduce development if you don’t own the property”, dugang sa konsehal.

Bisan wala pa mitumaw ang isyu sa pagpanag-iya sa landfill, si Garganera supak na sa pagpatukod sa koral palibot niini. Hinuon pabor siya sa temporaryong koral. 

Samtang suportado niini ang rehabilitasyon sa landfill.

“Dili lang unta nila usikan ang kwarta sa gobyerno nga P36 million… even before aning pag-claim (sa property). But, I’m one with the city in pursuing our claim over that property”, dugang sa Konsehal. (/DILT)(BANAT NEWS)