Prisohan sa isla gisugyot
CEBU, Philippines — Gisugyot sa pangulo sa Provincial Health Office (PHO) nga mangita og bakante nga isla sa Probinsya sa Sugbo nga mahimong prisohan alang sa mga inmates sa lalawigan.
Ang maong sugyot subay kini sa taho sa kadagkuan sa Bureau of Jail Management and Penology (BJMP) atol sa Peace and Order Council (PPOC) meeting kagahapon diin mitug-an kini nga puno-puno na ang mga jail facilities nga gidumala nila.
Bisan sa Cebu Provincial Detention and Rehabilitation Center (CPDRC) wala na modawat og piniriso kay dul-an na sa kwatro mil ang mga inmates sa sulod, puno na kon itandi sa 1,500 nga kapasidad niini.
Si Catan nagkanayon nga adunay mga isla sa probinsiya nga walay tawo o wala magamit nga mahimong katukoran og prisohan. “Why not see the model of looking to that possibility for future consideration rather than sige ta og build, build unya mapuno lang gihapon” matud ni Catan.
Dugang sa doktor nga kon adto sa isla, ihatag lang sa gobyerno ang panginahanglan sa mga priso ug didto hatagan usab og interventions aron nga adunay mahimo ang mga inmates. “In terms of security, kanang high profile inmates they can roam around, unya tudloan some livelihood so that when they are out, then mahimo na sila ma-integrate sa society” dugang niya.
“In terms of hearing their cases, pananglitan adto na sila ibutang sa isla nga layo, we can have the wheels to come in, maybe i-ferry ang judge didto to hear the cases” dugang ni Catan.
Matud niya nga dili dali ang pagsulbad sa kahuot sa mga prisohan kay nagkadaghan ang populasyon sa mga tawo.
Si Gobernador Hilario Davide III miuyon sa maong sugyot ug nagkanayon nga mas maayo kon adunay tigom nga himoon uban ang mga concerned agencies aron kini matuki og maayo. (BANAT NEWS)
- Latest
