Bagyo wala makahulga sa deboto

CEBU, Philippines – Wala mahulga sa bagyong Samuel ang 65-anyos nga babaye nga deboto sa Birhen sa Regla nga taga Lungsod sa Tubigon, Probinsiya sa Bohol diin nianhi gyud kini sa Sugbo aron sa pagtuman sa iyang saad sa pagpamista ug pagpanagkot atol sa kapistahan sa birhen niining tuiga.

Si Leonila Bermudez o “Manding Nila” usa sa mga nakasakay sa pump boat gikan sa Bohol alang sa pagpamista sa Dakbayan sa Lapu-Lapu.

Gipahimutang nila sa pagdunggo ang giluwanan nilang pump boat diha sa kilid nga bahin sa Mulle Osmeña habig na sa Barangay Looc, Dakbayan sa Lapu-Lapu.

Kauban ni Manding Nila ang laing napulo pa ka pasahero nga namista uban sa duha ka tripulante sa  pump boat kinsa sama kaniya ang tuyo mao ang pagtuman sa ilang mga saaran sa birhen.

Ang pumpboat nga ilang giluwanan mao usab ang temporaryo nilang gipuy-an diin anha usab sila mangaon sa gidala nilang pagkaon.

Si Manding Nila niasoy nga niadtong bulan sa Abril niining tuiga kalit siya nga naghambin og balatian nga pagpanakit sa iyang buko-buko ug panakit sa iyang abaga nga maoy hinungdan nga maglisod siya paglihok sa iyang duha ka bukton.

Gumikan sa hilabihang ka sakit nagpahilot siya sa manghihilot nilang silingan kinsa miingon nga adunay nalugpitan niyang mga ugat  ug gipaniguro niining maulian sulod lang sa tulo ka adlaw nga paghilot.

Apan nilungtad og kapin sa usa ka semana gikan sa paghilot nga wala mahupay ang kasakit nga iyang gibati hinungdan nga nagpahiling siya og doktor ug mitambag kaniya sa pagpaubos sa physical therapy.

Giresitahan usab siya og mga tambal nga makahupay sa gibati niyang kasakit apan mawala lamang og pipila ka oras human sa pagtumar sa tambal.

Ug tungod niadto gihugtan niya ang pag-ampo sa Birhen sa Regla ug misaad nga kon mahingpit na unya iyang kaayohan sa pista niini karong tuiga modagkot siya ug maghalad og mga bulak.

Matud ni Manding Nila nga sa iyang pagmata nianang pagkabuntag gikan sa iyang pagkahinanok og katulog maoy iyang namatikdan nga nahanaw na ang gibati niyang kasakit sa bukobuko ug abaga  ug makalihok na usab ang iyang bukton. -/BDB (BANAT NEWS)