Magpale ug Davide dili magbaylo og daganan
CEBU, Philippines — Giangkon ni Bise Gobernador Agnes Magpale nga aduna nay alyansa ang Barug Alang sa Kauswagan ug Demokrasiya (BAKUD) Party ug ang Hugpong ng Pagbabago alang sa umaabot nga midterm election sa tuig 2019.
“Congressman Red (Durano) confirmed to me, nga confirmed na na ang alliance sa BAKUD and Hugpong,” matud ni Magpale.
Ang bise gobernador didto sa balay ni Durano diin didto siya gipahibalo sa maong alyansa. Ang BAKUD mao ang partido sa mga Durano sa kinto distrito samtang ang Hugpong ng Pagbabago mao ang bag-ong gama nga regional party ni Davao City Mayor Sara Duterte.
Gipaabot nga makigtagbo ang BAKUD kang Mayor Duterte nga gikatakdang mobisita sa Dakbayan sa Mandaue alang usab sa alyansa nila sa partido ni Mandaue City Mayor Luigi Quisumbing ini’g ka Oktubre 22.
Si Magpale didto sa Dakbayan sa Davao niadtong Oktubre 12 uban ni kanhi board member Grecilda “Gigi” Sanchez ug Geraldine “Gaye” Yapha kon diin nakigtagbo sila kang Sara Duterte.
Si Magpale nitug-an nga si Sanchez molansar og balik pagka board member bokal sa trisero distrito samtang si Yapha maoy modaghan pagka kongresista.
Si Sanchez ug Yapha aduna kini giumol nga local party sa trisero distrito ang Sidlak Tercero, apan matud ni Yapha dili kini rehistrado nga partido sa Comelec. Matud ni Yapha nga ang ilang national party mao ang NPC.
Tungod sa pag-adto ni Magpale sa Davao, nigawas ang mga hungihong nga siya na ang modagan pagka-gobernador ug magbaylo sila ni Gobernador Hilario Davide III.
Apan gihimakak dayon kini ni Magpale ug niklaro nga magpabilin nga “Davide-Magpale” ang tandem. Matud niya na “misinterpret” lang ang ilang pag-adto sa Davao.
“We would like to clarify nga akong position, I am the candidate of NPC (Nationalist Peoples Coalition) for vice governor, BAKUD-NPC. Si Governor (Davide) remains the candidate of Liberal Party pero mosuporta ang BAKUD niya,” matud ni Magpale. (BANAT NEWS)
- Latest
