Usbaw sa multa sa overloading gisuportahan

CEBU, Philippines — Nipadayag sa ilang suporta ang Cebu City Council sa Senate Bill No. 2036 diin nagtinguha sa pagpasaka sa penalty sa overloading sa mga public utility vehicles (PUVs).

Kini human ang tanang konsehal niuyon sa resolusyon ni Konsehal Sisinio Andales.

“WHEREAS, the said bill seeks to increase the penalty of overloading of passengers in public utility vehicles above registered carrying capacity as determined by the Department of Transportation (DOTr),” tipik sa resolusyon.

Ang maong bill giduso nilang Senador Emmanuel “Manny” Pacquiao ug Joseph Victor Ejercito.

Matud ni Andales nga nihimo siya sa initiative sa pagduso sa resolusyon human iyang nakita ang maayong tumong niini alang sa publiko ilabi na sa mga sumasakay.

Ang balaudnon nagseguro sa kaluwasan ug proteksiyon sa tanang tawo ingon man ang istriktong pagpatuman sa balaud.

Sa maong balaudnon, ang tag-iya, operators, drivers, conductors ug uban pang responsableng tawo gidid-an sa pagkarga og pasahero nga lapas sa unsay kapasidad niini.

Adunay multa nga P50,000 ug suspension sa franchise ug driver’s license ang ipahamtang sa unang kalapasan.

Multa nga P250,000 ug suspension sa prangkisa ug driver’s license sa ikaduha ug P1-million ug revocation sa prangkisa ug driver’s license na sa ikatulong kalapasan.

Gawas niini, penalty sab nga pagkabilanggo sulod sa duha ngadto na sa unom ka tuig ang ipahamtang kon ang overloading moresulta sa kamatayon sa pasahero.

Sa kasamtangan ang Republic Act No. 4136, o ang Land Transportation and Traffic Code nagpahamtang og P2,000 ngadto na sa P3,000 nga multa ug suspension sa certificate of public convenience sa overloading vehicles. (BANAT NEWS)