8 pusher sikop sa managlahing lugar
CEBU, Philippines — Nasakmit ang armas ug mga pakete sa shabu gikan sa mga pusher nga nadakpan sa managlahing buy-bust operation sa kapolisan sa Dakbayan sa Lapu-Lapu, Lungsod sa Borbon, Cordova, Compostela, Daanbantayan ug Consolacion.
Si Senior Police Officer 2 Laurencio Wagwag sa Cordova Police Station niila sa nadakpan nga si Bonifacio Robles Jr., 25, taga Bankal, Ibabao, Cordova, kinsa nasakmitan og lima ka pakete sa shabu ug kalibre 38 armas nga adunay lima ka bala.
Nadakpan sa buy-bust operation sa kapolisan ang pusher sa Purok Nangka, Jugan, Consolacion nga giila ni Police Inspector Elmond Mondaya nga si Laurence dela Calzada, 38, kinsa nakuhaan og lima ka gagmay nga pakete sa shabu.
Nadakpan sab sa Sitio Tacan, Ibo, Dakbayan sa Lapu-Lapu ang pusher nga si Gerald Lacandula, 28, kinsa nakuhaan og walo ka gagmay nga pakete sa shabu.
Si Chief Inspector Wayne Magbanua, hepe sa Presinto 2 sa Lapu-Lapu City Police Office, niila sa nadakpan sa Sitio Datag, Maribago alas 9 pasado sa niaging gabii nga si Jose Augusto, 46, kinsa nakuhaan og siyam ka gagmay ug usa ka medium-size nga pakete sa shabu ug usa ka kalibre .38 uban ang mga bala.
Sa Sitio Mustang, Pusok nadakpan alas 12 kagahapon sa udto si Robinzon Impas, 41, sakop sa City of Lapu-Lapu Allied Forces (CLAF), kinsa nasakmitan og unom ka gagmay nga pakete sa shabu. Nadakpan ang pusher sa Poblacion, Compostela nga giila ni Senior Inspector Junafe Vergara nga si Lou Francis Flores, 35, kinsa nakuhaan og lima ka gagmay nga pakete sa shabu.
Nadakpan sab sa Malingin, Daabantayan ang pusher nga si Lemuel Limpiado, 34, nagpuyo sa maong dapit.
Laing nadakpan mao si Delmark Maano, 25, taga Lungsod sa Borbon nga nakuhaan og tulo ka gagmay nga pakete sa shabu. (/GMR)(BANATNEWS)
- Latest
