Mas daghan pasahero sa CSBT atol sa eleksyon
CEBU, Philippines — Moabot sa P369,000 ang kita sa Cebu South Bus Terminal (CSBT) gikan sa terminal fees atol sa niaging eleksyon. Base kini sa gidaghanon sa mga bus trips sa terminal sulod sa tulo ka adlaw sa wala pa ang eleksyon.
Matud ni Joey Herrera, manager sa CSBT, nga sukad niadtong Mayo 11 hangtud Mayo 14 sa udto, nitala ang terminal og 2,460 bus trips.
Ang terminal maningil og tag P150 nga terminal fee sa mga bus. Moabot usab sa 135,300 ang gibana-bana nga gidaghanon sa mga pasahero ang nidagsa sa terminal niadtong higayuna.
Matud ni Herrera nga mao kini ang labing daghan nga pasahero nga ilang natala sa usa ka holiday.
"Sukad-sukad nga diha ko nag-manager sa terminal, mao jud na siyay pinaka daghan or the volume of passengers, nga among na experience," matud ni Herrera.
Gani niadtong Mayo 12, adunay pasahero nga nagpaabot og bus nga halos unom ka oras sukad sa iyang pag-abot sa alas 6 sa hapon apan nakasakay alas 12 na sa tungang gabii.
Sa normal nga holiday, matud ni Herrera nga moabot lang og tulo hangtud upat ka oras ang paghuwat sa pasahero.
"Tungod sa kadaghan sa pasahero, tungod sa election nga Lunes, maong nanguli ang tanan. Wala ko gatuo nga ing-ana kadaghan ang pasahero," matud ni Herrera.
Si Herrera niangkon nga atol sa peak season, nakadawat usab siya og reklamo gikan sa mga pasahero. Pipila lang sa nadawat nga reklamo ang kadugay sa pagsakay og bus, kakuwang sa tubig ug ingon man overcharging.
"Nahutdan og tubig ang sa CR tungod sa seguro sa volume sa tubig ang capacity nato ba," pasabot ni Herrera. Siya nisaad nga ilang han-ayon sunod ilabi na nga mid-term eleksyon sunod tuig ug daghan na usab ang modagsa sa terminal aron mopauli sa ilang mga lungsod aron nga mobotar. (GMR) (BANAT NEWS)
- Latest
