‘Polis’ nanglungkab, gidakop
CEBU, Philippines — Usa ka suspetsadong kawatan nga adunay peke nga ID sa polis gidakop sa mga tinuod nga tinugyanan sa balaod kay giingong nakuha siya sa footage sa CCTV camera nga nanglungkab og internetan didto sa Poblacion, Dumanjug kaniadtong Martes sa kaadlawon.
Ang gidakop mao si Robilito Bebe Misal ug si Francis Niño Dayondon, pulos nagpuyo sa Dumanjug. Si Misal maoy nakuhaan og peke nga ID sa polis nga nagpakita nga nagranggo siya og SPO2, ug nadestino sa Criminal Investigation and Detection Group (CIDG).
Matud ni SPO4 Florencio Clarion sa Dumanjug Police Station nga pag-review sa footage sa CCTV, naklaro ang panagway sa duha nga maoy gibasehan sa mga polis pagdakop kanila.
Imbes nga kasong pagpangawat ra ang ipasaka sa mga dinakpan, pasakaan pa gyud kini og kaso nga Usurpation of Authority kay nagpatuo man siya nga polis. (RUB) (BANAT NEWS)
- Latest
