Naglakaw gidunggab sa ig-agaw

CEBU, Philippines — Giunay og dunggab ang 40-anyos nga lalaki sa iyang 55-anyos nga ig-agaw sa Sitio Tinago, Ibo, Dakbayan sa Toledo niadtong Sabado sa gabii.

Ang biktima giila sa Toledo City Police Station nga si Roderick Chavez samtang ang suspek mao si Reynaldo Caballero, pulos residente sa maong barangay. Asoy pa ni SPO1 Jose Baldecaza nga naglakaw ang biktima kauban sa iyang kapuyo gikan sa barangay hall dihang giatngan kini sa suspek ug gidunggab.

Nakaangkon og samad dinunggaban ang biktima sa walang bahin sa tiyan ug dali nga gidala sa tambalanan samtang ang suspek ang nadakpan ra sab sa kapolisan pinaagi sa hot pursuit operation.

Wala pa masuta ang motibo sa pagpanunggab samtang kasong frustrated murder ang ipasaka batok sa suspek. (BANAT NEWS)