Polis gi-ambush patay
CEBU, Philippines — Ang biktima mao si PO2 Romeo Santiago Bolaño, 49, taga Barangay Lawaan 1, dakbayan sa Talisay.
Si Bolaño kanhi nadestino sa Siyudad sa Naga apan gibalhin niadtong 2016 ngadto sa Police Regional Office Cordillera.
Si Chief Insp. Verniño Noserale, pangu sa Minglanilla Police Station nibutyag nga si Balaño nipauli kuyog si SPO2 Maricor Aliganga, 38, nadestino sa Naga City Police ug ilang higala nga si Clifford Zamora, 42 , taga dakbayan sa Naga.
Si Bolaño ang nagmaneho sa iyang sakyanan nga Toyota Corolla nga kolor nga puwa nga nagtangag sa plaka nga YCJ-570.
Asoy pa ni Noserale nga nihunong ang biktima dapit sa Palawan Pawnshop kay gihapit si Aliganga apan diha na kini giduol sa wa pa mailhing mamumuno.
Matud pa buto-buto na lang sa armas ang nadungog ni Aliganga kinsa daling miresponde ug nakita niyang nagkadugo na si Bolaño ug si Zamora nga nasamdan sab sa iyang wala nga batiis.
Apan ala 1:57 sa hapon namatay si Bolaño kinsa giingong daghang igo sa bala diha sa wala nga ilokan.
Walay nakuha nga basiyo sa bala sa armas diha sa crime scene hinungdan nga sila nagtuo nga revolver ang gamit sa mamumuno.
Sigon pa ni Noserale nga naa lang sa duha ka dupa ang gilay-on sa gunman ngadto sa biktima. Ilang gisubay kon aduna ba’y CCTV footage ang mga establisemento sa lugar.
Padayon pa ang imbestigasyon sa motibo sa maong krimen. Wala pa sab masayod si Noserale kon nganung gidestino pud sa laing rehiyon ang biktima.
Apan matud pa ni Police Officer 2 Liberty Chamcan sa Personnel Accounting Information System sa Police Regional Office Cordillera nga gitawgan sa Banat News, si Bolaño niadto pang tuig 2016 nabalhin gikan sa ilang probinsya ngadto sa PNP Headquarters Support Service sa Campo Crame. (BANAT NEWS)
- Latest