Cebu Archdiocese, CentCom motabang sa Biliran
CEBU, Philippines — Mopaambit og hinabang ang Archdiocese of Cebu ngadto sa Northern ug Eastern Samar ilabi na kadtong apektado sa Bagyong Urduja.
Kini ang gibutyag ni Cebu Archbishop Jose Palma kinsa nagkanayon nga dili gyud kalikayan ang Pilipinas nga duawon kanunay og mga katalagman matag tapos sa tuig.
Sumala pa ni Palma nga subo man palandungon ang maong panghitabo apan sayud siya nga adunay daghan kaayong katawhan ug simbahan pinaagi sa Caritas sa Sugbo nga mohimo dayon og mga pamaagi aron makahimo og dinalian nga pagtabang sa mga nanginahanglan.
Samtang gialerto na sa Armed Forces of the Philippines-Central Command ang Naval Forces Central sa pag-deploy sa ilang mga barko nga makahatud sa mga hinabang sa mga apektadong lugar sa Bagyong Urduja.
Matud sa tigpamaba sa CentCom, Col. Medel Aguilar, nga ilang hatagan og importansya kadtong nabiktima sa Eastern Visayas diin nikabat sa 26 ka tawo ang namatay human natabunan sa landslide sa Biliran ug kadtong nangaanod sa flash floods sa Masbate.
Laing bagyo nga gitawag sa Philippine Atmospheric Geophysical and Astronomical Services Administration og Vinta ang gibana-banang mosulod sa Philippine Area of Responsibility ugmang adlawa.
Matud pa nga posibleng mag-landfall kini sa Eastern Mindanao o Eastern Visayas diin makahatag og grabeng pag-uwan sa Sugbo hangtud sa adlaw sa Pasko. (BANAT NEWS)
- Latest