CEBU, Philippines — Kalampusan ug mga suliran sa Dakbayan sa Lapu-Lapu nga gustong solusyonan maoy unod sa State of the City Address ni Mayor Paz Radaza nga gitawag niya og Report to the Oponganons.
Unang gipahigayon ang session sa konseho Miyerkules sa buntag sa Dakbayan sa Lapu-Lapu pagtugot sa Report to the Opanganons ni Radaza sulod sa Hoopsdome.
Iyang giwadwad sa mga nanambong ang mga nahimo sa iyang pangagamhanan ug mga hagit nga giatubang niini sa natad sa edukasyon, imprastraktura, investment, turismo, peace and order ug uban pa.
Gipahibawo sa mayor nga gumikan sa ilang hugot nga suporta sa kampanya batok ilegal nga drugas nikubos og 22 porsiyento ang total crime volume sa dakbayan sa tuig 2016 kon itandi sa nanglabay nga katuigan.
Nikubos usab og 16 porsiyento ang Average Monthly Index Crime sa nilabay nga tuig. Adunay mga drug surrenderers nga gipatrabaho sa siyudad. Sa natad sa patigayon, si Radaza miingon nga padayon ang pagsaka sa mga namuhonan ilabi na sa industriya sa turismo sa nilabay nga tuig. Daghan usab ang nakatrabaho ug mahinangpon niyang gipahibalo sunod tuig sila maoy mo-host sa laing dakong event nga mao ang Asia-Pacific Championships sa Ironman Triathlon.
Gihisgotan usab ni Radaza ang problema sa kahuot sa trapiko ug kini ilaha nang gipangitaan og solusyon pinaagi sa pagpalit og mga traffic lights nga hingpit mo-operate duha ngadto sa tulo ka buwan gikan karon. (BANAT NEWS)