Freight company sa Mandaue pasirad-an
CEBU, Philippines - Hayan mapasirad-an ang yarda sa usa ka freight company sa Looc, Dakbayan sa Mandaue nga una na nga gireklamo sa mga residente.
Kini human nasuta sa Mandaue City Legal Office nga ang business permit sa Philippine Multimodal Freight Services, Inc. narehistro sa Barangay Alang-Alang.
Sa Notice to Comply nga gipetsahan og Marso 13, 2017 ngadto kang Anne Marie Louise Ugarte sa PMFSI, si City Legal Officer Omar Redulla nipahibawo nga nakalapas ang kompaniya sa ordinansa sa siyudad.
Gitagalan og 30 ka adlaw ang kompaniya nga makakompleto sa rekisitos sa ilang business permit kun dili sirad-an kini ugmang adlawa, Abril 13.
Niadtong Enero mokabat sa 280 ka petitioners nga gipangulohan ni Dr. Danilo Dionson ang nihangyo sa konseho sa siyudad nga dili na i-renew ang permit sa PMFSI nga ilang gipasanginlan nga nakaguba sa karsada gumikan sa mga dagkung container vans nga moagi.
Apan sa iyang tubag niadtong Enero 25, 2017, si Louis Ugarte sa PMFSI nihimakak sa pasangil ug nipahibawo nga kutob na lang sa Agosto 8 ang ilang pag-abang sa luna ug wala na silay plano nga kini i-renew. - /GMR) (BANAT NEWS)
- Latest
