CEBU, Philippines - Giawhag ang mga lokal nga kagamhanan ug kabarangayan sa tibuok Probinsiya sa Sugbo sa pagpalig-on sa tagsatagsa nila kang anti-drug abuse councils.
Kini pinasikad sa Memorandum Circular Nos. 98-277; 2003-131 ug 2015-63 sa Department of Interior and Local Government (DILG).
Si Bokal Raul Bacaltos nagkanayon nga bisan sa agresibong kampanya sa kapolisan ug ubang law enforcement agencies, ang mga ilegal nga kalihukan sa mga drug personalities padayon gihapon diha sa komunidad.
Matud ni Bacaltos nga gikinahanglan ang aktibong pagpanginlabot sa mga lokal nga kagamhanan lakip na ang kabarangayan sa kampanya batok sa ginadiling drugas.
Gikan sa agresibong kampanya batok sa ginadiling drugas, ang kapolisan nag-focus karon sa internal cleansing ug matud ni Bacaltos nga posibleng molighot na usab ang mga drug personalities sa ilang mga ilegal nga kalihukan.
Dugang ni Bacaltos nga ang pagpalig-on sa Barangay Anti-Drug Abuse Councils usa sa maayong lakang nga makaprotekta sa komunidad pinaagi sa paghimo og anti-drug abuse programs ug projects diha sa mga lugar. (BANAT NEWS)