Dul-an 300 EJK case ang napasaka

CEBU, Philippines – Dul-an sa 300 pa lang ka kaso sa giingong Extra Judicial Killings (EJK) ang naabot sa prosecutors office gikan sa 4,737 ka mga kaso sa pagpatay nga natala sa Commision on Human Rights sa tibuok nasud. Mao kini ang gitug-an ni CHR Commissioner Chito Gascon nga nahinabi sa mga tigbalita atol sa iyang pagbisita sa Sugbo.

Matud pa ni Gascon, upat ka buwan kapin gikan sa paglingkod ni Presidente Rodrigo Duterte wala pay bisan usa nga napasakaan na og kaso may kalabutan sa giingong Extra Judicial killings.

Sumala pa ni Gascon, sa 4 mil kapin ka mga kaso 1,800 niini ang napatay sa police operations tibuok Pilipinas, samtang ang nahibilin gitawag sa mga polis nga “death under investigation (DUI).”

Iyang gipanawagan ang kapulisan nga pang-ilhon ang ilang mga ginsakopan ilabi na kadtong mga scalawags ug nag-moonlighting nga posibleng maoy naghimo niining  vigilante-style killings diin sagad sa biktima nalambigit sa illegal drugs. Malaumon siya nga aprobaran ang pundo sa ilang Witness Protection Program para sa sunod nga tuig tungod kay sa pagkakaron magpanghadlok gyud ang mga potensiyal nga testigos batok sa EJK.

Plano usab nilang madugangan ang ilang mga sakop apil na niini ang mga imbestigador, mga abogado ug staff sa ilang mga opisina, ang kakuwang sa ilang mga sakop maoy usa sa rason nganong nagtapun-og ilang mga kasong giimbestigahan. Iyaha usab gihangop ang pag-anhi sa UN Special Rapporteurs nga maghimo og imbestigasyon kalabot niining nagkadaghang kaso sa gipatay dungan sa “war on drugs” ni Duterte. Matud niya, motabang ang CHR sa maong mga imbestigador sa UN.

Kagahapong adlawa nipagawas og manifesto ang mga kabataang sakop sa Network for Social Democracy in Asia batok extra-judicial killings (EJK) dinhi sa nasud.

Matud pa ni Justine Balane sa Akbayan Youth, wala nawala ang problema sa illegal drugs ang kampanya ni Duterte kay kadto rang mga kabus nga mga drug peddlers maoy nangamatay samtang ang mga big time drug lords padayong gawasnon ug kadtong mga nadakpan adunay special treatment. Alang sa ilang grupo ang solusyon mao ang pagpalambo sa health ug human rights, i-rehabilitate ang tanang mga adik ug ipapriso ang tanang drug pushers.

Si That Zon Lynn Hitin, representante sa nasud sa Myanmar nitug-an nga managsama ang situwasyon sa Pilipinas ug ilang nasud.

Nibati siya sa gibati karon sa kabataan batok niining extra-judicial killings dinhi sa nasud ug angay ayuhon sa mga otoridad ang ilang trabaho aron madakpan ug masilotan gyud ang mga drug peddlers. - /EIM) (BANAT NEWS)