CEBU, Philippines - Gi-downgrade ang 16 ka tambalanan sa Probinsiya sa Sugbo ngadto na lang sa pagka-primary care hospital tungod sa kakuwang og pasilidad, ekipo ug personahe.
Gipasabot sa hepe sa Provincial Health Office, Dr. Rene Catan, nga kaniadto ang leveling sa mga hospital nga gilangkuban sa primary, secondary ug tertiary ang basehan niini mao lang ang bed capacity.
Apan nausab ang classification dihang nisulod ang Philippine Health Insurance Corporation diin ang leveling sa mga tambalanan gibase na sa ilang pasilidad, ekipo ug personnel hinungdan nga na-downgrade ang nahisgutang mga tambalanan sa probinsiya.
Matud ni Catan nga ang maong problema panahon pa sa niaging administrasyon.
Ang mga provincial hospitals ang na-downgrade usab tungod kay niadtong higayona ang personnel sa mga tambalanan mga outsource ug walay organic personnel.
Gibutyag ni Catan nga gisugyot nila sa gobernador nga mag-develop og mga “key hospitals” nga langkuban sa Dakbayan sa Bogo, Lungsod sa Balamban, Dakbayan sa Danao ug Carcar.
Mokabat sa P2.5 bilyones ang kinahanglang budget alang sa pagpalambo sa level sa maong mga tambalanan.
Gipasabot ni Catan nga dili masagubang sa probinsiya kung ang tanang tambalanan kung pauswagon ang mga level niini hinungdan nga nagpili lang og mga key hospitals. (BANAT NEWS)