CEBU, Philippines - Unom ka tawo nasikop sa managlahing operasyon sa kapolisan sa dakbayan sa Mandaue ug Talisay ug sa lungsod sa Consolacion.
Mipahigayon og buy-bust operation niadtong nakalabay nga hapon ang Consolacion Police pinanguluhan sa ilang hepe nga si PCInsp. Wilson Abot batok kang Benny Cavan Adolfo, kinsa mitahan na sa ilang Oplan Tukhang sa Barangay Pulpogan.
Atol sa operasyon, human nakabantay nga polis ang iyang gikatransaksyon midagan si Adolfo paingon sa sulod sa ilang panimalay hinungdan nga nasakpan ang laing duha ka tawo nga nagsuyop.
Matud ni PO1 Cresenciano Saladaga nga ang duha ka manuyupay nailhan nga silang John Ronald Pabelino ug Emmanuel Quimod Perolino.
Sa dakbayan sa Mandaue, usa ka Erbil Mendoza nga taga Purok 6, Barangay Cubacub ang nadakpan usab sa kapolisan nga nagsuyop og shabu alas 10 sa miaging gabii.
Gibutyag ni SPO3 Danilo Barrita sa Presinto 6 sa Mandaue City Police Office nga ang agawon sa dinakpan nga si Julius Dy maoy nanawag sa ilang buhatan dihang namatikdan niini nagsuyop og shabu ang dinakpan.
Sa dakbayan sa Talisay, nasikop ang usa ka ginang nga tigpayuhot usab og ilegal nga drugas sa sulod sa usa ka pension house sa Barangay Dumlog niadtong Sabado sa hapon.
Ang nadakpan mao si Aileen Cemeni taga Sitio Galaxy sa Barangay Tanke kinsa nalakip sa watchlist sa kapulisan hinungdan nga gipahigayonan kinig buy-bust operation.
Nahitabo ang transaksyon sa giabangang kwarto ni Cemeni. Ang poseur buyer nga usa ka pulis nagpakuyog sa trabahante sa pension house paingon sa kwarto sa suspek aron dili sila mabantayan nga polis.
Dihang nagtinunulay na sa shabu ug kwarta, gisikop dayon nila ang suspek kinsa nakuhaan og 150 ka medium sized packed nga shabu.
Lakip nga gisikop ang kuyog ni Cemeni sa iyang kwarto nga si Juvy Tecson, 28 anyos kay nakuhaan kinig laing lima ka medium sized pack nga shabu. Nagkantidad ang tanan og P70 mil.
Nakuhaan usab ang mga dinakpan sa mga nagkadaiyang drug paraphernalia hinungdan nga nagtuo ang kapulisan nga sa maong kwarto nag-repack ang mga suspek human nagpalayo sa Barangay Tanke. (BANAT NEWS)