Demolisyon diriyot nagubot

CEBU, Philippines -  Diriyot nagubot ang demolisyon sa Barangay Guizo, Dakbayan sa Mandaue kagahapon sa buntag human daghan sa mga residente ang nisuway og babag.

Usa sa nahinabi sa Banat News si Ann Marie Paquibot, apektado sa demolisyon, nagkanayon nga ilang gikabalak-an sa pagpatuman sa reblocking basin og dili na sila makabalik sa ilang tugkaran kay matud pa dili sila makabayad sa i-abuno nga yuta.

Nidugang si Paquibot nga dili sila supak sa reblocking apan dili sila gusto nga mobalik og puyo sa Cebu International Convention Center kay gawas nga baho, basin og ang ilang kamatyan mao ang grabeng kainit maong gusto na silang magtukod og barong-barong sa nasunugan.

Giklaro hinoon ni City Legal Officer, Atty. John Eddu Ibañez, nga libre ang giabuno nga yuta ug sayop ang pagtuo nga dili sila makabalik sa ilang tugkaran.

Gitataw ni Ibañez nga patas nga bahinon ang luna ug makabalik ang tanan.

Nagtuo hinoon kini nga ang gikabalak-an sa mga residente nga dili na sila makabalik sa ilang mga dagku nga luna kaniadto.

Wala pa nasugdi ang reblocking, daghan nang mga balay ang hinay-hinay nga nibarug sa lugar bisan og walay pagtugot gikan sa siyudad. Hunyo 2 nigawas ang notice of demolition apan giingong nilapas na ang tagal nga gihatag ug wala gihapon molihok ang mga residente.

Hinoon matud ni Guizo Barangay Kapitan Jesus Neri nga gihatagan og laing tulo ka adlaw nga lugway ang mga residente aron sila maoy boluntaryo nga moguba sa balay ug kung dili gihapon kini molihok, ang demolition team na ang moguba sa mga istraktura. (BANAT NEWS)