Eskapo napusilan, tinai niawas

CEBU, Philippines – Nahabwa ang tinai sa piniriso sa Carmen Police Station diha’ng kini napusilan sa mga polis atol sa ginukdanay human ni-eskapo sa selda pasado alas 10 sa gabii niadto’ng Sabado.

Ang pugante naila nga si Dionisio Castro, 26 anyos, taga Cambanay, Dakbayan sa Danao ug halos tulo ka buwan na nga napriso sa kaso’ng rape sa usa ka minor de edad.

Sumala pa ni Senior Police Officer 2 Simplicio Gibo, desk officer sa Carmen Police Station, nga giatol ni Castro ang pag-eskapo samtang saba kaayo ang tupad nga gymnasium diin adunay disco sa kasaulugan sa ila’ng Sinulog.

Gilangkat ni Castro ang kabilya nga gibutang sa kisame sa ila’ng selda dayon nilusot sa atop.

Atol sa hitabo, ang laing duha ka piniriso ang giingong wala gyud nagsaba.

Ang nagsilbi’ng jailer niadto’ng orasa nga si PO3 Jemore Quimque ang nalipat usab kay aduna’y nagpa-blotter.

Diha’ng iya’ng gisusi mao’y nakita nga nawala na si Castro ug usa ka piniriso nisulti nga ipasubay sa likod kay naa na sa atop si Castro.

Pagsubay ni Quimque iya’ng nakita si Castro nga niambak gikan sa atop, nidagan ug nikatkat sa 15 ka tiil nga koral.

Didto na nahitabo ang ginukdanay diin sa diha’ng paingon na unta pusilon ni Quimque si Castro, nabuwasot hinuon kini sa kanal ug maayo’ng pagkalukot.

Angol sa tiil tungod sa paglayat ug mga pangos sa lawas ang naangkon ni Quimque hangtud nakasibat si Castro.

Kagahapon sa buntag diha’ng nakakuha og impormasyon ang kapolisan nga nasigpatan sa Barangay Cambanay, Dakbayan sa Danao si Castro nga nibisita sa balay sa iya’ng igsuon, dali kini nga gisusi.

Apan diha’ng nakabantay si Castro nisutoy kini og dagan paingon sa katubohan.

Ang mga polis nga naggukod nakabantay nga nibunot og armas si Castro ug giunhan na lang sa pagpusil ug maayo’ng pagka-igo sa kilid sa tiyan lapos sa pusod hinungdan nga niawas ang tinai.

Si Castro dali nga nitago sa katubohan apan pipila ka minutos nitahan kini sa kapolisan kay nagpanglipong na gumikan sa samad sa iya’ng tiyan ug nagsapwang na sa iya’ng tinai.

Gidala sa Vicente Sotto Memorial Medical Center si Castro diin padayong giatiman sa doktor.

Narekober sa kapolisan gikan ni Castro ang .22 revolver. – /GMR) (BANAT NEWS)