CEBU, Philippines - Patay nang napalgan nga naghigot sa iyang liog ang usa ka mekaniko diha sa ilang panimay sa Sitio Taboksapa, Brgy. Jaclupan, Dakbayan sa Talisay niadtong Martes sa alas-2 sa hapon.
Gidala pa sa Talisay City District Hospital si Mark Cabuenas Delvo, 22, apan gideklarar kini nga dead on arrival.
Si Senior Police Officer 1 Mikie Espina sa Talisay City Police Station nagkanayon base sa nakuha niyang impormasyon gikan sa dapit napungot si Delvo sa iyang uyab kay wa siya tubaga sa iyang mga tawag sa cellphone.
Gamit ang habol gihigot niya kini sa iyang liog ug ang pikas tumoy didto sa ilang kisame dayon nagpabitay.
Ang ig-agaw sa namatay nga si Jasen Cabuenas ang nakadiskubre sa lawas ni Delvo.
Asoy pa ni Espina nga ang mga paryente ni Delvo nihulagway kaniya nga luoran ug dali nga mahiubos.
Sa dihang nakauyab si Delvo nga estudyante sa kolehiyo cellphone na lang ang pirme niining giatubang aron monitoron iyang hinigugma, duna nay insidente kaniadto nga nisuway kini paghikog tungod kay wala tubaga sa uyab iyang tawag apan napakgang.
Ang uyab ni Delvo ang gikaingong wala lang makatubag sa iyang tawag tungod kay daghan pud ang gisugo kaniya. (BANAT NEWS)