CEBU, Philippines - Nabiktima sa pagpanglabni ug pagpanulis ang duha ka ginang samtang sakay og traysikol ug traysikad padulong sa tagsatagsa nila ka padulngan sa Dakbayan sa Talisay.
Gilabnihan sa iya’ng bag si Maria Daisy Luz Petalcorin, 48, nga taga Barangay Pooc samtang nagsakay og traysikol sa Mananga 1, Tabunok kagahapon sa kadlawon.
Matud ni PO3 Junyl Ater sa Talisay City Police Station nga padulong na nga mopauli ang biktima diha’ng usa ka pasahero ang nipahunong ug nanaug apan gihapit paglabni ang bag sa biktima nga adunay sulod nga Samsung Grand Neo Duo nga kantidad og P7,000; iPhone nga P5,000; Samsung Small nga tag P700; pitaka nga adunay P4,000 nga kwarta ug uban pa.
Ang manglabnihay dali ra’ng nawagtang human nisulod sa sikit-sikit nga mga balay sa nahisgutang lugar.
Samtang gitulis sa nagmotorsiklo’ng mga lalaki si Sandra Lyn Cortes, 36, nga taga Sta. Catalina Subdivision.
Ang biktima sakay sa traysikad padulong sa parkinganan sa mga pasaheroang jeep aron motrabaho sa Barangay Tabunok niadto’ng Sabado sa kadlawon.
Duha ka lalaki nga nagsakay sa motorsiklo ang ni-overtake ug ninaug ang backrider dayon bunot sa iya’ng armas ug giingnan nga dili mopalag ang biktima kinsa tungod sa kahadlok nihatag sa iya’ng bag nga adunay sulod nga cellphone nga kantidad og P2,500 ug iya’ng kwarta nga P200. ((BANAT NEWS)